Xafiiska Xalka Waara ee Wasaaradda Qorsheynta, Maalgashiga iyo Hormarinta Dhaqaalaha Dowladda Federalka Soomaaliya ayaa maanta kullan wadatashi ah magaalada Kismaayo kula yeeshay ganacstada Maamul Goboleedka Jubbaland.
Wadatashigaan ayaa diiradda lagu saaray doorka ganacsatadu ku leeyihiin dedaalada Xalka Waara loogu raadinayo barakacayaasha Maamul Goboleedka Jubbaland, kuwaas oo isugu jira dad ka soo laabtay xeryaha qaxootiga Dhadhaab iyo sidoo kale dadka ku barakacsan gudaha deegaanada Jubbaland, iyada oo furitaanka shirka ay goobjoog ka ahaaayeen qaar ka mid ah Wasiiradda wasaaradaha uu barnaamijku quseeyo oo kala ah; Wasaaradda Qorshaynta, Wasaaradda Ganacsiga, Wasaaradda Howlaha Guud, Wasaaradda Shaqada iyo Shaqaalaha, Maamulka Magaalada Kismaayo, Hay’adda Qaxootiga Jubbaland, Rugta Ganacsiga Jubaland iyo khubaro iyo hawl wadeeno ka socday Xafiiska Xalka Waara ee Wasaaradda Qorshaynta Qaranka.
Wadatashiga oo ka mid ah fulinta istiraatijiyadda xalka waara ayaa waxa lagu falanqayeey kaalinta ay ka qaadan karaan ganacsatada Jubbaland dadaalada xalka loogu raadinayo shacabka ku barakacay gudaha Jubbaland iyo kuwa ka soo laabtay xeryaha qaxootiga dalalka dariska ah, iyada oo la raacayo halbeegyada Istaraajiyadda Qaran ee Xalka Waara (2020-2024) taas oo ay ku cadyihiin ahmiyadda qorshe hawleedyada ay tahay in la fuliyo.
Ugu dambeyntii, madaxda Dowlad Goboleedka Jubbaland iyo xubno ka mid ah Rugta Ganacsiga Jubaland ayaa boggaadiyay dedaalada socda iyo Istaarajiyada ka mira-dhalinta qorshe howleedka si loo gaaro himilada guud ee ah qaxootiga iyo barakacayaasha in ay helaan xaquuqda ay helaan bulshada inteeda kale, ayna ugu weyn tahay xuquuqda baahiyaha aas aasiga ah.
