Guddoomiyaha Degmada Ceelberde ee Gobolka Bakool Haadi Siraad Cumar ayaa sheegay in maanta magaalada ay gaartay diyaarad siday gargaar beni’aadanimo oo loogu talagalay dadka ay abaartu saameysay ee ku nool degmada iyo deegaannada kale ee ku xeeran.
Guddoomiyaha oo la hadlay Radio Muqdisho ayaa sheegay in deeqdan ay ku soo beegantahay xilli ay baahi weyn u qabeen bulshada, isagoo intaa ku daray in baahida degmada ka jirta aysan ku filneyn hal diyaarad, balse ay ka mahadcelinayaan cidkasta oo gacan ka geystay gargaarkan.
“Dhibaatooyinka argagixisadu nagu heyso waxaa ka mid ah miinooyin badan oo ay ku aaseen waddooyinka, kaasi oo dhawaan ay ku dhinteen saddex ruux oo mid ah dumar tahay, halka uu ku dhaawacmay waddihii mootada, waxaana jirta in ciidamadu ay ku guuleysteen inay dhowr miino ka saaraan waddooyinka”. Ayuu yiri Guddoomiye Haaddi.
Mudane Haadi Siraad Cumar ayaa xusay in xaaladda amni ee degmada ay tahay mid la isku halayn karo, balse ay ka cabanayaan dhibaatooyin ay argagixisada Al-Shabaab ay ku hayaan dhanka deegaannada ka baxsan degamda Ceelberde oo ay argagixisadu galiyeen miinooyin, kuwaasi oo ay waxyeelo ka soo gaartay dadka baadiyaha fog ku nool.
Guddoomiyaha Degmada Ceelberde ee Gobolka Bakool Haadi Siraad Cumar ayaa dowladda Federaalka iyo Maamulka Koonfur Galbeed ka dalbaday in laga caawiyo sidii la isaga xoreyn lahaa argagixisada Al-Shabaab ee dhivaatada ku haya bulshada Gobolka ku nool.
