Munaasabaddan oo ay soo qaban qaabisay Safaaradda Soomaaliya ee Dalka Kenya laguna weyneynayay 64 sano guurada ka soo wareegatay markii Gobolada Koonfureed ay xornimada ka qaateen gumeystihii Talyaaniga iyo Israacii Labada Gobal ee Waqooyi iyo Koonfur ayaa waxaa ka qeybgalay Safiirka Soomaaliya ee Kenya Danjire Jabriil Ibraahim Cabdulle, Xildhibaanno ka tirsan Baarlamaanka JFS, Mas’uuliyiin hore iyo dadweyne aad fara badan.
Munaasabadda ayaa intii ay socotay waxaa xafladda lagu soo bandhigay suugaan ka turjumayaa halgankii loo soo maray xornimada.
Xuseen Carab Ciise oo horey xilal uga soo qabtay dowladihii hore ayaa ku baaqay xoojinta midnimada iyo wadajirka bulshada Soomaaliyeed, isagoo carabka ku dhuftay in aanan marnaba la aqbali doonin kala go’a ummadda Soomaaliyeed. Waajibna ay tahay in la ilaaliyo wadajirka iyo midnimada.
Xildhibaan Maxamed Ibraahim Macalimuu oo ka tirsan Xildhibaannada Golaha Shacabka BJFS ayaa tilmaamay muhiimadda sida Dhallinyarada Soomaaliyeed ay isugu soo baxeen xuska Maalinta 1da Luulyo.
Safiirka Soomaaliya ee dalka Kenya Danjire Jabriil Ibraahim Cabdulle ayaa shacabka uga hambalyeeyay munaasadda isagoo wakiil ka ah madaxda Qaranka.
Danjire Jabriil ayaa sidoo kale u mahadceliyay Dowladda Kenya sida ay u difaacdo danaha dadka iyo ganacsatada Soomaaliyeed ee ku nool Kenya, kuwaasoo kaalin ka geystay isku xirka labada dal.
“Hambalyo mar kale dhammaan shacabka Soomaaliyeed meel kasta oo aad joogtaan. Waan ku faaneynaa himilada iyo horumarka dalkeenna. Waan wada jirnaa waxaana u halgamaynaa mustaqbal wanaagsan”. Ayuu yiri Danjire Jabriil.
