Wasiirka Warfaafinta Dhaqanka iyo Dalxiiska XFS oo soo xiray tababar lagu baranayay habka sameynta iyo soo saarista Filimada ayaa sheegay in la joogo waqtigii dib loo soo celin lahaa doorkii ay lahayd Wakaaladda Filimada Soomaaliyeed.
Munaasabadda xiritaanka Tababarkan oo socday muddo 5 maalmood ayna soo qaban qaabisay Wakaaladda Filimada ee Wasaaradda Warfaafinta waxaa ka qeyb galay Wasiirka Wasaaradda Warfaafinta Dhaqanka iyo Dalxiiska Mudane Daa’uud Aweys Jaamac, Ku-simaha agaasimaha guud ahna agaasimaha maamulka iyo Maaliyadda Cabdinaasir Xasan Xuseen, iyo qaar kamid ah agaasime waaxyada wasaaradda.
Tababarkan oo loo qabtay 30 xubnood oo ka kala socda shirkadaha Filimada iyo Warbaahinta kale ayaa intii uu socday waxaa lagu baranayay casharo laxiriira habka sameynta iyo soo saarista Filimada bulshada loo gudbinayo.
Ku-simaha agaasimaha guud ahna agaasimaha maamulka iyo maaliyadda mudane Cabdinaasir Xasan Xuseen ayaa bogaadiyay ka qeybgalayaasha tababarka, si bulshada ay ula wadaagaan fariimo wacyigelineed.
Wasiirka Wasaaradda Warfaafinta Dhaqanka iyo Dalxiiska Mudane Daa’uud Aweys Jaamac oo si rasmi ah u soo xiray tababarkan wuxuu si weyn uga hadlay muhiimada ay leeyihiin Filimada gaagaaban ee bulshada loo gudbinayo, isagoo dhanka kale xusay in la joogi waqtigii dib loo soo noolayn lahaa doorkii Wakaaladda Filimada Soomaaliyeed.
Ugu dambeyntii Wasiirka Warfaafinta XFS ayaa shahaadooyin guddoonsiiyay ka qeybgalayaasha tababarkaan iyo macalinkii duruusta bixinayay.
