Ilaa inta la xaqiijiyay 25 qof ayaa ku geeriyootay kadib markii dab xooggan uu ka kacay xalay mid ka mid ah iskuullada Islaamiga ah ee ku yaala magalaaada Kualalumbur ee xarunta Dalka Malesia.
Dadka ku dhintay dabkaasi ayaa ah 23 arday iyo 2 macalin waxaana ku dhaawacantahay ilaal 7 qof oo kale, lamana oga ilaa iyo haatan sababta dhabta ah ee dhalisay dabkaasi, oo ka kacay xarun Qur’aanka Kariimka ah lagu xifdiyo oo lagu magacaabo Ittifaqiyah,waxaana uu dabkaasi kacay aroor hore xilli ay jiifeen inta badan dadka.
Khirudin Drahman, oo ah agaasimaha Hay’adda dabdamiska ee Dalkaasi Malesia oo goobtaasi gaaray ayaa Wakaaladda Wararka Faransiiska ee AFP u sheegay in qasaaraha uu intaasi la egyahay, waxaana uu intaasi ku daray in la soo bad baadiyay 11 qof oo kale.
Waxaa soconaya baaritaano ay hay’adaha ammaanka Dalkaasi ku hayaan sababta dhalisay dadkaasi,waxaana weli aan si rasmi ah macluumaad dheeraad ah looga bixin da’da ardaydaasi ee iskuulka hoyga ee Ittifaqiyah lagu xanaaneeyo.
Dalka Malaysia ayaa inta badan caan ku ah xarumaha lagu barto duruusta diiniga ah oo ay ardaydu seexdaan, waana wadanka ugu horeeya ee Qaaradda Assia oo ay ardayda ka kala socota wadamada Africa ay waxbarasho u aadaan.
