Allah u naxariistee, waxaa xalay isbitaal ku yaala magaalada Miniapples ee dalka Mareykanku ku geeriyooday, rug caddaa saxaafadeed Cabduqaadir Maxamed Mursal oo muddo aad u dheer ku soo jirey mihnidda warbaahinta, sida ay xaqiijiyeen ehelkiisa.
Wariye Cilmi Maxamed Waare, oo ku sugan Mareykanka isla markaana ay asxaab ahaayeen saxafiga ayaa warbaahinta qaranka u sheegay in uu xalay geeriyooday Cabduqaadir Maxamed Mursal oo muddo labo bilood ah ku jirey isbitaal.
Waxaa uu intaas ku daray in saxafiga oo haleeley cudurka safmarka ah ee COVID-19 hase yeeshee uu ka bogsooday, balse dhakhaatiirta ayaa sheegay in xanuunkaas uu waxyeeleeyay sanbabada taasna uu hadda u geeriyooday, Allah u naxariistee.
Cabduqaadir Maxamed Mursal, waxaa uu kamid ahaa wariyeyaashii ka howlgali jirey Radio Muqdisho todobaataneeyadii, tan iyo waagaas waxaa uu ka tirsanaa bahda saxaafadda oo khibradiisa ugu faa’ideyn jirey wariyeyaasha da’da yar.
Cabduqaadir, oo muddo ku noolaa magaalada Nairobi ee dalka Kenya halkaas oo uu ka ahaa agaasimaha Idaacadda Ergo oo horey loo oran jirey Irin oo arrimaha bani aadanimada ka shaqeysa, sidoo kale waxaa uu ahaa tababare saxaafadeed.
Wariye Cilmi Waare, ayaa sheegay in tan iyo 2014 uu Mareykanka ku noolaa halkaas oo ay degan yihiin qoyskiisa, sidoo kale Allah u naxariistee Cabduqaadir inta uu Mareykanka joogay waxaa uu Idaacad Af-Soomaali ku hadasha ka aas aasay magaalada Miniapples oo ilaa iyo hadda shaqeysa.
