Ciidamada Booliska Soomaaliya ayaa Caawa Gacanta ku dhigay Gaari nooca Dadweynaha ee loo yaqaano Mini Bus oo uu saarnaa Qariga Hoobiyaha ee Loo Adeegsada Madaafiic Caawa lagu weeraray Degmada Xamar Jabjab ee Gobalka Banaadir.
Ciidamada ayaa iska caabin kala kulmay Kooxda madaafiicda tuureysa oo gaarayay illaa afar ruux.
Afhayeenka Wasaaradda Amniga Xukuumadda Soomaaliya Cabdi Kaamil Macalin Shukri ayaa Wakaaladda Wararka Soomaaliyeed ee SONNA u sheegay in ciidamada booliska oo heegan ugu jiray Sugidda Ammaanka Magaalada muqdisho ay dabagaleen koox ka tirsan Al-shabab oo Hoobiyaal ka tuurayay Gudaha Magaalada Muqdisho.
“Agagaar xaaji baasto ayey gaari caasi ah oo nooca dadweynaha qaada ah iyagoo adeegsanaya caawa hoobiyeyaal ka soo tuureen, 4 qof ayaa saarnaa iyo Hoobiyihii ay tuurayeen ciidamada booliska ayaa ka hortagay, hadda waxaa xaafadaha dhexdooda laga baadigoobayaa afartii nin oo qaarkood dhaawacyo qaba”ayuu yiri Mudane C.kaamil
Ciidamada Booliska iyo kuwa nabad sugidda ayaa iminka ku howlan baaritaanada kooxaha saarnaa gaariga Caasiga ah ee Hoobiyaasha laga soo tuuray.
Inta la xaqiijiyay 2 Qof oo dad rayid ah ayaa geeriyootay 10 kalana dhaawacyo kala duwan ayaa soo gaartay kadib markii Madaafiic ay ku dhaceen Xaafado katirsan Degmada Xamar Jabjab ee Gobalka Banaadir
