Wararka ka imaanaya deegaanka Buurdhuxunle oo ka tirsan gobolka Bakool ayaa sheegaya in ku dhowaad 15 ruux ay u geeriyooday cudurka shuban biyood oo ka dilaacay deegaankaas, iyadoo in ka badan 20 qof oo kale laga daweynaayo shubanka, sida ay sheegeen dadka deegaanka.
Mid kamid ah howl wadeenada caafimaad ee deegaanka ka howlgala ayaa sheegay in dadka u dhintay cudurka shubanka ay isugu jiraan carruur iyo dad da’ah, isagoo intaa ku daray in kiiskii ugu horeeyay ee lagu arkay Buurdhuxunle 6 bishan Fibraayo isla markaana maalinba maalinta ka dambeysa uu isa soo tarayay.
Deegaanka cudurka uu ka dilaacay oo 30 KM u jira degmada Waajid, ayaa waxaa gacanta ku haya maleeshiyaadka Al-shabab, mana lahan xarun caafimaad deegaanka, iyadoo sidoo kalena ay adag tahay in dowladda Soomaaliya iyo hey’adaha caafimaadka ka shaqeeya u gurmadaan dadka cudurka uu haleeley.
Dad muxsiniin ah oo si iskood isku xil-qaamay oo ku kala sugan magaalooyinka Baydhabo iyo Xudur ayaa dawooyinka lagula tacaalo cudurka shubanka u direy deegaanka Buurdhuxunle.
Wararka ayaa intaa ku daraya, in laga cabsi qabo in tirada cudurka uu soo ridanaayo ay intaa ka sii kororto daryeelka caafimaad oo aad u liita awgeed.
Cudurka shubanka ayaa waxaa uu faro ba’an ku haya dadka ku nool deegaano badan oo gobolada dalka kamid ah kuwaas oo ay saameysay abaaraha iyo biyo la’aan bahsan.
