Wararka aan ka heleyno dalka Uganda waxay sheegayaan in caasimadda Kampala ay goordhaw ka dhaceen ugu yaraan labo qarax oo waaweyn, sida ay ku warantay warbaahinta gudaha ee dalkaas.ย
Qaraxa koowaad ayaa ka dhacay xarun laga dukaameysto oo u dhaw saldhigga dhexe ee booliska ka howlgala magaalada Kampala, halka qaraxa labaad uu ka dhacay meel u dhaw dhismaha baarlamaanka wadanka Uganda.
Related posts
Goobjoogayaal ayaa warbaahinta u sheegay in qaraxyadu ay aad u xooganaayeen, isla markaana ay gilgileen dhismayaasha waaweyn ee caasimadda.
Warbaahinta ka howlgasha gudaha dalkaas waxay soo bandhigtay muuqaallo muujinaya gaadiid gubanaya iyo dadka oo kala cararaya, waxaana la soo sheegayaa in deg deg heegan loo geliyey booliska magaalada Kampala.
Sidoo kale kooxaha gurmadka deg dega ah ayaa bilaabay dadaallo loogu gurmanayo dadka ku waxyeeloobay qaraxyada iyo deminta dabka ka dhashay oo qabsaday gaadiid iyo dhismayaashii ka ah dhawaa goobta.
Bishii lasoo dhaafay ayay aheyd markii labo qof ay ku dhinteen qaraxyo ka dhacay dalkaas Uganda.
Mas’uuliyiinta dowladda waxay qaraxyadaas ku eedeeyeen inay ka dambeysay koox fallaago ah oo Islaami ah oo fadhigeedu yahay Jamhuuriyadda Dimuqraadiga ee Congo.
Ugu yaraan 50 qof ayey dowladda Uganda u xirtay inay ku lug lahaayeen qaraxyadaas, qaar kamid ah dadkan ayaana dacwado lagu soo oogay.
ย
