Sarkaalka ka arrimiya bariga Libya, ee Jeneraal Khaliifa Xaftaar ayaa maanta oo Talaado ah shaaciyay inuu yahay musharrax madaxweyne oo doonaya inuu ka qeyb galo doorashada loogu tartamayo madaxtinimada dalkaas ee la filayo inay Libya ka dhacdo bisha soo socda ee December, sida uu ku sheegay khudbad uu ka jeediyay telefishinka wadankaas.
Xaftar waxa uu qiray in doorasho ka dhacda Libya ay tahay wadada kaliya ee looga bixi karo khilaafka 10-sano jirsaday ee ka jira dalka Libya.
Warbaahinta maxalliga ayaa werisay in Xaftar uu maanta galinka dambe tegi doono magaalada Bangaazhi, halkaas oo uu kula kulmi doono xubnaha guddiga doorashada oo u gudbin doono warqadiisa musharraxnimada.
“Doorashooyinku waa sida kaliya ee looga bixi karo qalalaasaha ba’an ee dalkeennu galay,” ayuu yiri Jeneraal Khaliifa Haftar, waxaana la filayaa inuu musharaxnimo isku diiwaan geliyo gelinka dambe ee Talaadada maanta ah.
Ku dhawaaqista musharaxnimada Jeneraal Xaftar waxay ku soo aadeysaa, xilli Axadii todobaadkaan uu shahaadada musharaxnimada madaxtinimada dalkaas qaatay Sayf al-Islam Qaddafi, oo ah wiil uu dhalay hogaamiyihii hore ee dalka Libya Korneyl Mucamar Al-Qadaafi.
Doorashadaan waxaa loo arkaa inay muhiim u tahay dalka Libya oo colaado sokeeye ay daashadeen sanadihii u dambeeyey, waxaana taageeraya in dalkaas ay doorasho xor ah ka dhacdo Qaramada Midoobey iyo wadamo badan oo shisheeye.
