Dowladda Imaaraadka Carabta ayaa maanta diyaarad gargaar ah ka soo dejisay garoonka diyaaradaha Aadan Cadde ee Muqdisho. Guddiga abaaraha ee Wasaaradda gargaarka oo ay oo hoggaamineysay wasiiru dowlaha Wasaaradda Tamarta iyo Biyaha ee Xukuumadda Federaal Soomaaliya Shukri Maxamuud Afrax ayaa deeqdaas ka guddoomay Safiirka Imaaraadka ee Soomaaliya, Danjire Maxamed Axmed Alcuthman.
Safiirka dalka Isutagga Imaaraadka Carabta u fadhiya Soomaaliya Maxamed Axmed Alcuthman oo ugu horreyn hadal ka jeediyay munaasabad wareejinta deeqdan gargaarka ayaa sheegay in ay ka mid tahay kaalmada gargaarka beni’aadannimo Imaaraadku ku saacidayaan Ummadda Soomaaliyeed oo wajahaya abaaro ba’an xilligan.
Deeqdan ayaa ah tii afaraad ee nuuceeda oo ka timaada dalka Isutagga Imaaraadka Carabta iyadoo qeybo kamid ah gobollada dalka la gaarsiiyay deeqaha gargaarka.
