Madaxweynaha Dowlad Goboleedka Puntland mudane Cabdullaahi Siciid Deni ayaa shacabka iyo Maamulka uga tacsiyadeeyay geerida askar ku dhimatay qarax lala eegtay kolonyo galbineysay isaga oo u socday magaalada Boosaso ee xarunta Gobolka Bari.
“Waxaan Ciidamada Madaxtooyada Puntland iyo guud ahaan Ciidamada Daraawiishta uga tacsiyeynayaa geerida Allaha u naxariiste Cabdullaahi Maxamed Shafeec iyo Maxamed Axmed Cabdullaahi oo ka tirsana Ciidamada Madaxtooyada, kuwaasi oo maanta ku geeriyooday qaraxii ka dhacay Boosaaso, waxay ahaayeen geesiyaal naftooda u huray dalkooda iyo dadkooda, Alle waxaan uga baryayaa inuu janadii geeyo, ehelkoodiina samir iyo iimaan uu ka siiyo. Sidoo kale waxaan intii dhaawacantayna Alle uga baryayaa in uu u boogga dhayo”. Ayuu yiri Madaxweynaha Puntland.
Madaxweynaha Puntland ayaa xusay in ciidamada ay marwalbo heegan u yihiin difaaca Dowladnimada, nabadda iyo horumarka deegannada Puntland, isla markaana weerarada noocaas oo kale ahna aysan Puntland u hakaneynin, isagoo intaa ku daray in Cadowga iyo kuwa la midka ka ah ee ku lugta leh falal argagixisonimada sharciga la marsiin doono.
