Tartan cilmiyeedka bisha Ramadaan oo ay si wada jir ah u baahinayaan Radio Muqdisho iyo Telefishinka Qaranka Soomaaliyeed ee SNTV, uuna taaba gelineyo sanadkii saddexaad Maamulka Gobolka Benaadir ayaa caawa wareegiiisa saddexaad waxaa tartan aad u xiiso badan ku dhexmaray degmooyinka Yaaqshiid Vs Wadajir oo ka wada tirsan Gobolka Banaadir, iyadoo labada dhinac ay muujiyeen dadaal iyo anshax wanaag inta uu tartanku socday.
Tartanka oo ahaa mid aad u xiiso badan ayaa tartamayaasha labada degmo waxa ay muujiyeen tartan wanaag oo ku dhisan aqlaaq iyo aqoon.
Sida xeerka barnaamijka dhigayo tartamaayasha labada degmo waxaa si isku mid ha loo weydiiyay min todobo su’aal oo ah su’aalaha loogu talagalay tartan cilmiyeedka Warbaahinta Qaranka.
Guddiga tartan cilmiyeedka Warbaahinta Qaranka ayaa shaaciyay in dhibcihii caawa ee labada tartame la shaacin doonin, isla markaana uu go’aamiyay in markale la isugu celiyo tartamayaasha Wadajir iyo Yaaqshiid oo ka wada tirsan gobolka Benaadir, guddiguna uu dib ka soo sheegi doono sababta keentay in dib la isugu celiyo labada tartame.
Habeen dambe oo ah habeenka 23aad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka Yaaqshiid iyo Wadajir oo uu guddiga go’aamiyay in la isku celiyo, waxaana tartanka koowaad uu dhici doonaa 7:30pm fiidnimo, halka ay isla habeen dambe saacaddu marka ay tahay 10:00pm is arki doonaan tartamayaasha Degmooyinka C/casiis iyo Kismaayo oo ka kala tirsan gobolada Benaadir iyo Jubbada Hoose.
