Shalay waxaa dunida oo dhan laga xusay Maalinta Caalamiga ah ee haweenka ee 8-da Maarso, iyadoo la qabtay munaasabado iyo xaflado waaweyn oo lagu muujinayay kaalinta ay bulshooyinka caalamka ku leeyihiin haweenku, horumarrada ay ku tallaabsadeen iyo caqabadaha ku hor gudban ee ay wajahayaan.
Dalkeenna Soomaaliya oo ay colaado daba dheeraaday soo mareen, waxa ay haweenku door laxaad leh ka qaateen dhinac kasta oo nolosha bulshada ka mid ah, iyagoo u dhabar adeygay dhibaatooyin fara badan.
Haddaba barnaamijkeenna Tubta Toosan ee caawa waxa aan kaga hadleynaa kaalinta haweenka Soomaaliyeed ka qaateen samata bixinta dalka, dhibaatooyinka ay la kulmaan iyo waxa xalku noqon karo.
Waxaa barnaamijka noogu mati ah Guddoomiyaha Ururka Haweenka Qaranka Soomaaliyeed ,Marwo Batuulo Sheikh Axmed Gaballe.
