Kulankaan oo ahaa mid looga hadlayay xoojinta dhiirigalinta iyo garab istaaga dadka qaba baahiyada gaarka ah ayna soo agaasimeen ururka East African Disability ayaa lagu qabtay magaalada Gaalkacyo
Kulanka oo ay goob joog ka ahaayeen masuuliyiin ka tirsan Galmudug iyo Puntland Qaar ka mid ah ururada naafada Puntland iyo Galmudug laguna daah furayay xarunta ururka uu ku yeelanayo Gaalkacyo ayaa waxaa ugu horeyn ka hadlay Guddoomiyaha Hay’adda East African Disability Axmed Cumar Maxamed Diini iyo Guddoomiye ku xigeenka Hay’adda Cabdishakuur Xuseen waxaana ay sheegeen in Dalka Mareykanka ay uga yimaadeen sidii ay bulshada ugu boorin lahaayeen in xil gaara la iska saaro dadka qaba baahiyaha gaarka ah ee ku nool Gobalka Mudug, maadaama ay leeyihiin Xuquuqaad la mid ah kuwa aan qabin baahiyaha gaarka ah iyaguna ay ka fureen Galkacyo Xafiiska Hay’adda oo ah hay’ad ka shaqeeyn doonta Dhiiri galinta Dadka qaba baahiyaha Gaarkaa.
Guddoomiye ku-xigeenka Degmada Gaalkacyo Injineer Maxamed Cabdi Cilmi oo ku hadlayay magaca labada maamul ayaa u mahadceliyay masuuliyiintii ka socatay Hay’adda East African DisApilty, isagoo sheegay in ay maamulada Degmada Gaalkacyo ay si wadajir ah ubixinayaan dhul looga dhiso dadka baahiyaha gaarka ah qaba xarun wax lagu baro laguna dhiiri galiyo
Kulanka oo intii uu socday ay ka hadleen Xubno ka socday ururada Naafada Gobalka Mudug ee Puntland iyo Galmudug, Madaxda ururada Nabadda ee Haweenka iyo dhallinyarada labada maamul ee gobalka, waxgarad kuwaas oo dhamaantood ka hadlay baahida ay qabaan Naafada ku nool Gobalka iyo waajibaadka ka saaran bulshada ayaa waxaa gunaanadkii soo xiray Xildhibaan Maxamed Xuseen Tahliil iyo Wasiir ku-xigeenka Wasaarada Caddaalada iyo Garsoorka Galmudug Maxamuud Guure Guuleed waxaana ay sheegeen in ka maamul ahaan ay garab istaagayaan Ururka East African Disability
