Madaxweynaha Galmudug iyo wafdi uu hogaaminayo oo gaaray Degmada Balanbal ee Gobolka Galgaduud ayaa waxaa halkaas si diiran ugu soo dhaweeyay xubno ka tirsan goleyaasha Xukuumadda Galmudug, maamulka Degmada iyo qeybaha kala duwan ee bulshada..
Mudane Maxamed Cabdi Kaariye “Qoor Qoor” oo garoonka kubadda cagta kula hadlay dadweyne isugu soo baxay soo dhaweyntiisa ayaa sheegay in degmada Balanbal lagu qabano gogol dib-u-heshiisiineed oo ku saabsan beelaha degga Galmudug.
Madaxweynaha Dowlad Goboleedka Galmudug ayaa xusay in socdaalkiisa Nabadda uu la xiriiro u kuurgelidda xaaladda dhabta ah e ka jirta deegaannada Galmudug, isagoo Maamulka iyo shacbaka ku booriyay inay isu diyaariyaan marti gelinta shirweynaha dib u heshiisiinta ee la qorsheynayo in lagu qabto Degmada Balanbal ee Gobolka Galgaduud.
Madaxweynaha Galmudug waxaa socdaalkiisa ku wehliya Madaxweyne ku-xigeenka dowlad Goboleedka Galmudug mudane Cali Daahir Ciid, Wasiiro iyo Xildhibaanno waxaana ay safar dhulka ah ku soo mareen Degmooyinka Caabudwaaq, Hobyo, Gaalkacyo, deegaanka Dhabad iyo deegaanno kale oo ka tirsan Galmudug.
