Madaxweynaha Iiraan Ibrahim Ra’iisi, ayaa sheegay in dalalka cadowga ku ah Iiraan ay ka careysan yihiin awoodda dalkiisa, si taasi meesha looga saarana ay qeyb ka yahiin abaabulka dibadbaxyada.
Ra’iisi, ayaa sidoo kale sheegay in dowladdu ay diyaar u tahay inay dhageysato dalabaadka dibadbaxayaasha, isla markaana ay ku dadaaleyso sidii ay u sameyn lahayd xarumo ay ku wada hadlaan dhallinyarada, aqoonyahanada iyo waxgaradka dalkaasi.
“Waa in la dhagaysto dalabaadka mudaaharadayaasha, golaha sare ee kacaanka waxaanu go’aansaday in la sameeyo xarumo lagu wadahadlo, cid walbana ra’yigeeda la dhagaysto, annagana haddaan nahay xukuumadda diyaar baanu u nahay mar walba arrintaasi, dhamaan shaqaalaha dawladda ee gobollada dalka waa inay abaabulaal shirar lala yeelanaya dhallinyarada, aqoonyahannada iyo wax-garadka si loo ogaado dalabaadka dadka, waxana looga qabto tabashadooda” Ayuu yiri Madaxweynaha Iiraan Ibrahim Ra’iisi.
Dhanka kale, ergeyga gaarka ah ee Maraykanka u qaabilsan Iiraan, Robert Malley, ayaa qoraal uu soo dhigay bartiisa Twitter-ka ku sheegay in Maraykanka uu taageerayo xuquuqda aasaasiga ah ee Shacabka Iiraan.
