Maxamed Cilmi Afrax “Mideeye” oo ka mid ah musharaxiinta u taagan qabashada xilka madaxtinimada goboladda dhexe ee dalka gaar ahaan Maamulka Gobollada Mudug iyo Galgaduud ayaa si diiran loogu soo dhaweeyay degmada Cadaado ee gobolka Galgaduud.
Munaasabad lagu soo dhaweynayay Maxamed Cilmi Afrax Mideeya oo ay ka qeyb galeen qeybaha kala duwan ee bulshada oo sitay boorar ay ku taageerayaan musharaxa ayaa ka dhacay afaafka hore ee magaalada Cadaado, halkaasi oo si saf mareen ah ugu gacan qaaday.
Sidoo kale Maamulka degmada Cadaado ayaa ka qeyb galay soo dhaweynta musharax Maxamed Cilmi Afrax Mideeye, iyadoo maamulka degmadu ay dhankooda shaaciyeen inay taageersanyihiin in Mideeye uu isu soo taago qabashada xilka Madaxtinimo ee gobollada dhexe.
Ugu dambeyntii Musharax Maxamed Cilmi Afrax “Mideeye” oo xafladda lagu soo dhaweynayay hadal kooban ka jeediyay ayaa ugu mahadceliyay maamulka iyo shacabka ku nool magaalada Cadaado sida diiran ay u soo dhaweeyeen, waxaana uu u balan qaaday in haddii uu ku guuleysto xilka uu u taaganyahay in uu si cadaalad ah ugu adeegi doono dhamaan bulshada Gobollada dhexe,
Maxamed Cilmi Afrax Mideeye ayaa hoosta ka xariiqay in socdaal kala duwan uu ku soo maray degmooyinka Gobolka Galgaduud, isla markaana uu kala soo kulmay soo dhaweyn diiran, uuna diyaar u yahay in uu ka shaqeeyo dib u heshiisiin dhab ah oo la dhex dhigo bulshada ku nool Gobollada Mudug iyo Galgaduud.
