Qoraa Cabdulaahi Diiriye Guuleed iyo Abwaan Maxamed Ibraahim Warsame “Hadraawi” ayaa Ummadda Soomaaliyeed ugu tacsiyadeeyay geeridii ku timid Marxuum Dr Xuseen Sheekh Axmed Kadare oo maanta lagu aasay qabuuro ku yaalla magaalada Muqdisho.
Qoraa Cabdulaahi Diiriye Guuleed oo la hadlay Radio Muqdisho ayaa bulshada Soomaaliyeed uga tacsiyadeeyay geeridii ku timid Dr Xusen Sheekh Axmed Kadare.
“Ummadda Soomaaliyeed oo dhan Samir iyo iimaan Allaha ka siiyo, ehelkiisa iyo inta aqoonta leh ee wax qori jirtay Samir iyo iimaan Allaha ka wada siiyo, runtii geeridu waa xaq, intii ku taqaanay akadeemiyada, dhaqanka, fanka iyo suugaanta waxa uu ahaa nin hal abuur ah, oo uu dadaal badan ku lahaa sida ay u dhisanyihiin geeraarada iyo suugaanta kale, waxaan kaloo isbaranay todobaatameeyadii, waxaana uu ahaa nin shaqsiyad fiican leh oo ay bulshada wada jeclaayeen” ayuu yiri Qoraa Cabdullaahi Diiriye Guuleed.
Sidoo kale Abwaan Maxamed Ibraahim Warsame “Hadraawi” oo isna ladlay Warbaahinta Qaranka isaga oo ku sugan magaalada Hargeysa ayaa guud ahaan Ummadda Soomaaliyeed uga tacsiyadeeya geerida marxuumka, isagoo xusay in Marxuum Xuseen Kadare uu ahaa nin hal abuur leh.
“Innaa lilaahi wa innaa ileyhi raajicuun, Dr Xuseen Sheekh Axmed Kadare Allaha u naxariisto oo jannadii fardowsa Allaha ka waraabiyo. waqti dheer ayaa ka dambeysay markii aan wada joognay Akadeemiyada Fanka iyo Suugaanta, waxa uu ahaa nin majaajiliista ahaa oo kaa qosolsiiya, waxa uu ahaa nin fur furan oo dabeecad wanaagsan, isla markaana ahaa hal abuure Soomaaliyeed”.
Abwaan Maxamed Ibraahim Warsame “Hadraawi” ayaa intaa ku daray “Qorista afka Soomaaliga door weyn ayuu ku lahaa, waa ninkii ku dagaalami jiray in la helo far Soomaali u gaar ah, teeda kale waxa uu ahaa nin waddani ah oo ay wada jeclaayeen dhamaan Ummadda Soomaaliyeed, waxaana is baranay 86-kii, gabay aan tiriyay ayaan isaga ku hadal qabsaday, Allaha u naxariisto”
