RADIO MUQDISHO(LAASCAANOOD):Β Waxaa maanta magaalada Laascaanood ee xarunta gobolka Sool ku wajahan Ra’uusul wasaaraha Xukuumadda Federaalka Soomaaliya, Mudane Xamse Cabdi Barre, halkaas oo si weyn loogu soo dhaweyn doono.
Safarkan magaalada Laascaanood uu maanta ku tagayo raysul wasaare Xamse, ayaa ah mid taariikhi ah, sidoo kalena ah safarkii ugu horreeyay ee magaalada Laascaanood ku tagayo, masuulkii ugu sarreeyay ee ka socda dawldda dhexe ee dalka.
Magaalada Laascaanood ayaa maalmahan iyo saacadihii u dambeeyayba waxaa si weyn looga dareemayay, u diyaar garowga ra’iisul wasaaraha iyo xubnaha wafdigiisa ah ee maanta ka ambabaxay, garoonka Aadan Cadde International ee Muqdisho. Xubnaha wafdiga ah ee ra’iisul wasaare Xamse safarka ku wehliya ayaa waxaa ka mid ah, wasiirrada arrimaha dibada, iyo kan gudaha, xildhibaanno iyo masuuliyiin sarsare oo ka tirsan dawladda Soomaaliya.
Waxaa sidoo kale halkaasi ku sugan, saxaafadda qaybaheeda kala duwan, oo ay ka mid yihiin wariyeyaasha warbaahinta qaranka, kuwaas oo halkaa toos uga soo tebinaya wararka ku saabsan safarka ra’iisul wasaare Xamse.
Shacab iyo masuuliyiin aad u tiro badan, kuwaas oo calanka Soomaaliya iyo caleemo ruxaya ayaa ku sugan garoonka, iyo jidadka waaweyn ee magaalada Laascaanood, iyadoo la joojiyay isku socodka gaadiidka magaalada, aminiga si weyn loo sugay.
