Ra’iisul wasaare ku-xigeenka Xukuumadda Federaalka Soomaaliya Mudane Maxamed Cumar Carte iyo wafdi uu hogaaminayay oo ay ka midyihiin Wasiir ku-xigeenka Amniga Cabdinaasir Maxamed Cali, taliye ku-xigeenka ciidanka booliska Jeneraal Mukhtaar Xuseen Afrax iyo mas’uuliyin kale ayaa maanta gaadhay magaalada Baydhabo ee xarunta kumeel gaarka ah ee maamulka Koofur Galbeed, waxaana garoonka ku soo dhoweeyey Madaxweynaha Dowlad goboleedka Koonfur Galbeed Shariif Xasan Sheekh Aadan, Xildhibaanno ka tirsan baarlamaanka Federaalka iyo mas’uuliyiin kale.
Intaas kadib wafdiga iyo madaxda dowlad goboleedka Koonfur Galbeed waxa ay wada qaateen kulan looga hadlayay sidii looga tashan lahaa qabyo qoraalka Siyaasadda Amniga Qaranka.
Ra’iisul Wasaare ku-xigeenka dalka Mudane Carte oo shirka hadal kooban ka jeediyay ayaa sheegay sida ay muhiimka u tahay in latashi lala yeesho dowlad goboleedyada xubnaha ka ah dowladda Federaalka, waxaana ka mid ahaa qodobadii la dul istaagay, Qaab dhismeedka Ciidamada heer Federaal iyo heer Dawlad Goboleed, lana xoojiyo isdhexgalka ciidanka.
In la qeexo hayadaha amniga masuuliyaadkooda iyo xidhiidhka ka dhexeeya Federaalka iyo dawlad goboleedyada.
In la sameeyo Guddida sare ee Amniga Qaranka iyo guddi farsamo oo la shaqaysa, sidoo kale in Maamul Goboleedyadu keensadaan cida wakiilka uga noqonaysa Siyaasadda Amniga Qaranka.
“Waa in laga wada shaqeeyo sidii jidgooyooyinka looga hortagi lahaa, iyadoo ay taasi iska kaashanayaan ciidamada amniga ee Heer Federaal iyo Heer Dowlad goboleed, waxaa kaloo muhiim ah in la xoojiyo isdhexgalka ciidamada, waxaanu diyaar u nahay in aan qaadano, wixi talooyin ah oo ay noo soo jeediyaan dowlad goboleedyada” ayuu yiri Mudane Maxamed Cumar Carte Ra’iisu wasaare ku-xigeenku.
Ugu dambeyntii Ra’iisu Wasaare ku-xigeenka Xukuumadda Federaalka ee Soomaaliya Mudane Maxamed Cumar Carte iyo Madaxweynaha Dowlad goboleedka Koonfur galbeed Shariif Xasan Sheekh Aadan ayaa isku afgartay in Siyaasadda Amniga Qaranka, laga wada shaqeeyo, ayna aragtidooda ku daraan qabyo qoraalka Siyaasadda Amniga Qaranka.
