Saaxiibada Beesha Caalamka ee Soomaaliya aaya soo dhaweeyay shirweynaha Dowladda Federaaalka Soomaaliya, Dowladaha xubnaha ka ah Dowladda Federaalka iyo Maamulka Gobolka Banaadir oo si guul leh ku soo idlaaday magaalada Muqdisho.
Bayaan ay si wada jir ah u soo saareen Saaxiibada Beesha Caalamka ee Soomaaliya ayaa yiri ”Waxaan Ra’iisul Wasaare Maxamed Xuseen Rooble bogaadinaynaa sida uu u hogaamiyay geeddi-socodkan, iyo sidoo kale Madaxweynayaasha Dowladaha Xubnaha ka ah Dowladda Federaalka, Guddoomiyaha Maamulka Gobolka Banaadir iyo siyaasiyiinta kale ee sida habsanida leh ee wax ku oolka ah uga qaybqaatay wadahadallada. Waxaan mahad u soo jeedinaynaa Madaxweyne Maxamed Cabdullaahi Maxamed ‘Farmaajo’ oo ku baaqay 1dii bishan Maajo in lagu laabto hanaanka doorashada 17 Sebtembar ee heshiiska ku saleysan”.
Bayaanka ayaa baaq loogu diray dhammaan saamilleyda inay si degdeg ah horey ugu socdaan si loo abaabulo doorashooyin loo wada dhanyahay oo daahfuran oo dib u dhac la’aan ah. Waxaan madaxda Soomaaliyeed ugu baaqaynaa inay wadahadal caadi ah oo dhexmara saxiixayaasha Heshiiskii 17kii Sebtembar ku xalliyaan wixii khilaaf ah ee mustaqbalka yimaada.
Saaxiibada Beesha Caalamku ayaa hoosta ka xariiqay inay diyaar u yihiin inay madaxda Soomaaliya ku taageeraan hirgelinta heshiiskan taariikhiga ah.
