Munaasabadaan oo ahayd mid lagu soo dhawaynayey Guddoomiyaha Baarlamaanka Galmudug Cali Gacal Casir ayaa xalay lagu qabtay Magaalada Dhuusamareb ee caasimadda Galmudug, waxaana ka soo qaybgalay Madaxwene kuxigeenka Galmudug Maxamed Cabdi Xaashi, Xildhibaanno, Wasiiro iyo qaybaha Bulshada.
Guddoomiyaha Degmada Dhuusaamreb Macallin Nuur Cilmi Cabdulle oo ugu horayn Munaasabadda kahadlay ayaa waxa uu sheegay in lagama maarmaan ay tahay in Bulshada lagu hogaamiyo siyaasad fur furan oo sahleysa in la helo fursado dadku ay ka faaiideystaan.
Xildhibaan Safiyo Cabdulle iyo Xildhibaan Maxamed C/qaadir Xaashi (Dholodholo) ayaa halkaasi ka hadlay waxeyna soo dhoweeyeen guddoomiyaha Baarlamaanka Galmudug Mudane Cali Gacal Casir oo ay kula dar daarmeen in uu ka shaqeeyo hirgelinta heshiiskii Galmudug iyo Ahlu sunna.
Cali Gacal Casir guddoomiyaha Baarlamaanka Galmudug ayaa waxa uu xusay in guddoonka Baarlamaanka iyo Xildhibaanadu ay u yimaadeen ka qayb qaadashada dhamaystirka heshiiskii lagu soo gaaray Jabuuti, wuxuuna hadalkiisa ku sii daray inaysan Bulshada Galmudug Xiligaan u baahnayn khilaaf hor leh.
