Ra’iisal Wasaare ku-Xigeenka Xukuumadda Federaalka Soomaaliya Mudane Maxamed Cumar Carte oo maanta shir gudoominayay shirkii horumarinta iyo dib-dhiska kaabayaasha dhaqaale ee dalka (SDRF Meeting) ayaa ka warbixiyay halka ay marayaan qorshayaasha horumarineed ee ka socda guud ahaan dalka Soomaaliya.
Shirkan oo ay si wada jir ah u shir guddoominayeen Ra’iisul wasaare ku-xigeenka dalka iyo Madaxa Midowga Yurub u qaabilsan horumarinta mashaariicda ee ku saabsan horumarka iyo dib-u-dhiska Kaabayaasha Dhaqaale ee Dalka ayaa waxaa ka qeyb galay Wasiirada dowadda Federaalka ah ee xubinta ka ah SDRF, ms’uuliyin ka tirsan Baarlamaanka Federaalka, xubno ka socday dawlad goboleedyada Puntland, Galmudug, Jubbaland, koonfur Galbeed iyo Benadir waxa kale oo goob joog ahaa wakiilada beesha caalamka ee Soomaaliya iyo wakiilada dowladaha Soomaaliya ka taageera dhanka horumarka.
Shirka oo ah mid bile ah, oo bishiiba mar la qabto ayaa diiradda lagu saaray waxyaabaha u qabsomay dowladda Federaalka ah iyo dowlad goboleedyada ee dhinacyada amniga, horumarka iyo adeegyada guud ee bulshada, iyadoo mas’uuliyiintii ka socday dowlad goboleedyada Puntland, Jubbaland, Galmudug, Koonfur galbeed iyo maamulka gobolka banaadir ay madasha ku soo bandhigeen waxyaabaha u qabsoomay, iyagoo xusay in howlgallo ka dhan ah Shabaabku ay fuliyeen, kaasi oo lagu guuleystay, ayna jiraan horumar dhinacyada kale laga gaaray.
Sidoo kale Wasiirka Qorsheynta ee Xukuumadda Soomaaliya mudane Cabdiraxmaan Sheekh Yuusuf Cali Ceynte iyo xubno kale oo shirka hadlay waxa ay si wada jir ah hoosta uga xariiqeen in dowladda federaalka ah ay ku tallaabsaday horumar dhinacyo badan leh.
Ra’iisul wasaare ku-xigeenka Soomaaliya Mudane Maxamed Cumar Carte oo shirka kadib la hadlay Telefishinka Qaranka ayaa xusay in shirka dowladda Soomaaliya lagu amaanay sida ay u maareeyeen dib u habeynta miisaaniyada, taasi oo sahashay in dowladda Soomaaliya ay iminka qaadan karto deeyman hor leh…
Mudane Maxamed Cumar Carte Ra’iisul Wasaare ku-xigeenka dalka ayaa isaga oo ku hadlaya magaca Xukuumadda Soomaaliya bulshada uga tacsiyadeeyay dadkii ku dhintay badda u dhexeysa Masar iyo Talyaaniga, dadka uu cudurka Yellow Feverka ah ku dilay dalka Angola, isagoo hay’adaha amniga ku amray in ay cadaaaladda horkeeneen dadkii ka dambeeyay falal dil ah oo Muqdisho ka dhacay..
Kulanka Horu-marka iyo Dib u dhiska Kaabayaasha Dhaqaale ee Dalka oo bishiiba mar la qabto ayaa maanta lagu falanqeeyay arrimo badan oo ay ugu horeyso halka ay marayaan qorshayaasha horu-marineed ee ka socda guud ahaan Soomaaliya.
