Waaxda Isku-duwidda Deeqaha ee Wasaaradda Qorsheynta, Maalgashiga iyo Horumarinta Dhaqaalaha Xukuumadda Federaalka Soomaaliya ayaa maanta qabatay Shirka Hannaanka Wadashaqaynta Tiirarka ee qaab-dhismeedka deeqaha dalka.
Shirkan oo socon doona muddo labo maalin ah, islamarkaana ay Isugu yimaadeen hay’adaha Dowladda Federaalka Soomaaliya, Maamul Goboleedyada Dalka iyo Saaxiibada Caalamiga ah ayaa looga hadlay saddex tiir oo kala ah: Horumarinta Dhaqaalaha, Caddaaladda iyo Amniga, Deegaanka iyo Isbedelka Cimmilada.
Waxaa madasha goobjoog ahaa oo kalmado furitaan ah ka jeediyay Xoghayaha Joogtada ee Wasaaradda Caddaaladda iyo Arimaha Dastuurka, Agaasimayaasha Guud ee Wasaaradaha Qorsheynta Qaranka, Deegaanka iyo Isbedelka Cimmilada iyo mas’uuliyiin ka socday Xafiiska Ra’iisal Wasaaraha Soomaaliya.
Qodobada ugu waaweynaa ee dhiiradda la saaray ayaa waxaa ugu muhiimsanaa hawlaha hortabinta u leh heerarka kala duwan ee hay’adaha dowladda ee hoos yimaada sadexda tiir ee aan kor kusoo xusnay, saameynta uu isbedelka Cimmilada ku reebay shacabka Soomaaliyeed iyo xoojinta wadashaqeynta hay’adaha dowladda iyo saaxiibada caalamiga ah.
