Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud ayaa maanta si rasmi ah u furay wajiga labaad ee Shirka madasha wada-tashiga heerka Qaran ee looga arrinsanayo doorashada sanadka 2016 lagu wado inay ka dhacdo dalka.
Shirka oo socon doona muddo labo maalmood ah waxaa ka qeyb-galaya madaxda dowladda federaalka, kuwa maamul goboleedyada, bulshada rayidka ah iyo wakiilo ka kala socda beesha caalamka, waxaana inta uu socda shirka lagu falaqeyn doonaa aragtida doorashooyinka ka dhici doona Soomaaliya,
Madaxweynayaasha dowlad goboleedyada Puntland iyo Jubbaland ayaa si isku mid ay u soo jeediyeen in doorashada sanadka 2016-ka ay noqoto mid lagu saleeyo dhanka deegaanka oo laga gudbo nidaamka qabiilka ku saleysan ee 4.5.
Sidoo kale Madaxweynayaasha Dowlad goboleedyada Galmdug iyo Koonfur galbeed ayaa dhankooda soo jeediyay in hanaanka doorashada sanadka 2016-ka laga dhigo mid ku saleysan nidaamkii la maray doorashadii sanadkii 2012-ka ee ah nidaamka qabiilka 4.5, inta laga gaarayo doorasho guud oo lagu qaban karo guud ahaan gobolada dalka.
Wakiilada beesha caalamka oo shirka ka hadlay ayaa sheegay inay soo dhaweynayaan goโaanada ka soo baxay shirka.
Raโiisul Wasaaraha Soomaaliya Mudane Cumar Cabdirashiid Cali Sharmaโarke oo isna shirka hadal kooban ka jeediyay ayaa tilmaamay in xukuumadda ay dadaal ugu jirto sidii doorasho ay uga dhici lahayd guud ahaan dalka.
Guddoomiyaha Baarlamaanka Federaalka ah ee Soomaaliya Mudane Maxamed Sheekh Cismaan Jawaari ayaa sheegay in madaxda ka qeybgalaysa shirka looga fadhiyo inay la yimaadaan aragti mid ah, si loo helo hanaan doorasho
Madaxweynaha Dowladda Federaalka ah ee Soomaaliya Mudane Xasan Sheekh Maxamuud oo furay shirka ayaa sheegay in dowladda ay tixgelineyso aragtida laga soo uruurriyay shirarkii wada tashiga, waxaana uu Madaxweynuhu rajo wanaagsan ka muujiyay in shirka ay ka soo bixi doonaan guulo wax ku ool ah
