Wafdi uu hogaaminayo Madaxweyne ku xigeenka Galmudug Mudane Maxamed Xaashi Cabdi ayaa booqday tuulada Dayenno oo 17-KM ka xigta waqooyi ka xigta Magaalada Cadaado.
Madaxweyne ku xigeenka booqashadiisa waxaa ku wehliyay qaar ka tirsan golaha Wasiirada dowlad goboleedka Galmudug sida Wasiiru dowlaha Madaxtooyada Mudane Hussein Qaasim Yuusuf Iidow, Wasiiru dowlaha Arrimaha Gudaha iyo dowlada hoose Cumar Maxamed Diiriye Guureeye, Wasiirka Amniga Cismaan Ciise Nuur (Taar-dhuleed), Wasiirka Kaluumeysiga Xasan Maxamed Warsame Gurey, Wasiirka Gaadiidka Cirka iyo Dhulka Iyo Duulista Hawada Cabdixakiin Macalin Axmed Maalin, Wasiirka Maaliyada Cali Sacid Cumar Ibraahim,Wasiir K/xigeenka Garsoorka iyo Dib u Hesiishiinta Maxamed Xayer Nuur, Taliyaha Nabadsugida Galmudug Saadaq Cumar Xasan iyo Taliye ku xigeenka Ciidanka Booliska Galmudug Cabdi Jaamac Cabdulle (Xabeeb)
Madaxda Maamulka Galmudug ayaa la kulantay dadka ku dhaqan Tuulada Dayeenno ayaa oo isugu jiray Odayaal dhaqmeedyo, Hooyooyin, Aqoonyahano iyo Dhalinyaro waxaana ay shacabka deegaanka Dayenno sheegeen baahida jira ee deegaan oo ay doonayaan in dowladu ay ka caawiso sida Baahida Amniga, Waxbarashada, Caafimaadka iyo Maamul u samaynta.
Wasiirka Amniga ayaa sheegay inay tahay muhiim in dadka deegaanku la shaqeeyaan maamulka isla markaana Odayaasha aysan taageerin Dhalinyarada Jidka gala iyo inaysan marka lasoo qabto qof burcad ah oo Isbaaro lagu qabto uusan iyaga Qabiil ahaan ugu dhaxdhuuman oo aysan ku difaacin Qabiil qofkii lagu soo qabto Isbaaro.
Ugu dabeyuntii Madaxweyne ku-xigeenka DG Galmudug Maxamed Xaashi Cabdi ayaa u balan qaaday dadka deegaanka in wax laga qaban doono cabashada baahidooda oo ay kamid yihiin in la dhiso Ciidanka Booliska deegaanka lagana taakulayn doono qalabka iyo mushaarka Ciidanka.
Madaxweyne ku-xigeenka ayaa sheegay inay sameyn doonaan goob daboosha dhamaan baahiyada caafimaad ee deegaanka Dayeenno iyo in Waxbarashada Iskuulka Dayeenno ay si bixin doonaan Golaha Wasiirada iyo Xildhibaanda DG Galmudug inta laga gaaray Qorshaha Maaliyadda Sanadka.
