Wasaaradda Arrimaha Dastuurka ee Xukuumadda Federaalka Soomaaliya ayaa magaalada Garoowe ee Caasimadda Dowlad Goboleedka Puntland ka furtay Tababarka Tababarayaasha ee Waxbarashada Madaniga iyo Wacyigelinta Dadweynaha ee dib-u-eegista Dastuurka.
Tababarka ayaa waxaa si wadajir ah u wadaqabanaya Wasaaradda Arrimaha Dastuurka ee DFS iyo Wasaaradda Arrimaha Dastuurka ee Puntland, tababarka oo ay qaadan doonaan xubno ka tirsan Dawlad Goboleedka Puntland iyo Bulshada Rayidka ayaa wuxuu socon doonaa afar maalin.
Xubno kamid ah Bulshada Rayidka Puntland ayaa maanta qaadanaya tababarka looga gonleeyahay in lagu daadejiyo dib-u-eegista Dastuurka, dhamaan qaybaha bulshada oo ka soo qaybgalay tababarka maanta ayaa lagula dardaarmay inay tababarka sii gaarsiiyaan dhamaan deegaanada Dawlad Goboleedka Puntland.
Kulanka ayaa waxaa furay Agaasimaha Guud ee Wasaaradda Arrimaha Dastuurka ee DFS Mudane Maxamed Abuukar Zubeyr isagoo uga mahadceliyay Bulshada Rayidka Puntland sida baaxadda leh ee ay tababarka uga soo qeybgaleen.
Dhinaca kale, waxaa goobta ka hadlay Agaasimaha Guud ee Wasaaradda Dastuurka Puntland iyo Gudoomiye Ku-Xigeenka Dallada ay ku mideysanyihiin Bulshada Rayidka Puntland ee PUNSAA, waxayna si wadajir ah u ballanqaadeen in tababarkan ay gaarsiin doonaan dhamaan deegaanada Puntland.
Ugu dambayn, tababarkan ayaa ah mid noociisa ay Wasaaradda horay ugu soo qabatay qaar kamid ah caasimadaha Dowlad Goboleedyada waana mid dadka Soomaaliyeed loogu diyaarinayo sidii ay uga qaybqaadan lahaayeen Ololaha Dib-u-eegista Dastuurka.
