Wasiirka Wasaaradda Gaadiidka iyo Duulista Hawada ee Xukuumadda Federaalka ah ee Soomaaliya Mudane Maxamed Cabdullaahi Salaad (Oomaar) oo maanta marti ku ahaa Barnaamij kulanka Todobaadka Jimcaha ee ka baxa Radio Muqdisho (Codka Jamhuuriyadda Soomaaliya) & Telefishinka Qaranka (SNTV) ayaa ka hadlay arrimo badan oo la xiriira howlaha ay qabato Wasaaradda.
Wasiir Oomaar ayaa sheegay in muddada kooban ay joogaan xafiiska waxyaabo badan ay u qabsoomeen, isla markaana kuwo oo kale oo muhiim ay u harsanyihiin.
Sidoo kale Wasiirka Wasaaradda Gaadiidka iyo Duulista Hawada Mudane Maxamed Cabdullaahi Salaad (Oomaar) ayaa sheegay in waxyaabaha ay diirada saareen ay ka mid tahay sidii ay ula soo wareegi lahaayeen maamulka Hawada Soomaaliya oo mudo ka badan 20-sano laga maamulayay magaalada Nairobi ee caasimada dalka Kenya.
“Maamulka gacanta ku haya hawada Soomaaliya waxaan isla garanay inay nagu soo wareejiyaan, maadaama aan rakibnay qalibka, waxaa jira tababbaro la siinayo shaqaalaha howshan noo qabanayo, sidoo kale waxaa jirta shaqaaale ajaanib ah oo howshan waday, iyaguna waan isla fahanay inaan xamar u soo guuraan oo aan ka faa”iideysano” ayuu yiri Wasiirka.
Wasiirka ayaa sheegay in lagu guuleystay mideynta taargada gaadiidka ka howlgallaya guud ahaan gobollada dalka, kaddib kulan uu la qaatay Wasiirada Gaadiidka ee dowlad goboleedyada, kuwaasi oo ay isla meel dhigeen in la mideeyo taargooyinka la siinayo gaadiidka, si loola socda dhaq dhaqaaqyadooda.
