Wasaaradda Ganacsiga iyo Warshadaha Soomaaliya ayaa Muqdisho ku qabatay shirka wada hadalka Dowladda iyo Ganacsiga gaarka ee Soomaaliya
Shirkan oo u jeedkiisu ahaa wada-hadalka dawladda iyo ganacsiga gaarka ah ee Soomaaliya isla-markaana si gaara u taabanayay siyaasadaha la xiriira Ganacsiga, Ganacsiyada yar-yar iyo kuwa dhaxe iyo Warshadaha, ayaa waxa soo qaban qaabisay Wasaaradda Ganacsiga iyo Warshadaha Soomaaliya oo kaashaneysa hay’adda DAI sidoo kalena uu taageerayey Midwoga Yurub.
Shirkan, oo ay kasoo qeyb-galeen Madaxda Wasaaradda, Ganacsatada, Ma’uuliyiin ka kala socda hay’adaha Dawladda iyo marti-sharaf kale, ayaa waxaa ugu horeyn ka hadlay Agaasimaha Guud ee Wasaaradda Ganacsiga iyo Warshadaha Soomaaliya Cabdicasiis Ibraahim Aadan, wuxuuna xusay Inuu hadafka shirkan yahay sidii loo dar-dar-galin lahaa isfahamka ka dhaxeeya Dowladda iyo Ganacsatada Soomaaliyeed si loo horumariyo Ganacsiga dalka.
Agaasimaha Guud ee Wasaaradda Kalluumeysiga iyo Kheryraadka Badda XFS Mudane Maxamuud iyo Gudoomiye ku xigeenka Rugta Ganacsiga Soomaaliyeed Cabdirixmaan Galaambi oo iyagu halkaas ka hadlay, ayaa sheegay in Wada hadalka Dowladda iyo ganacsatada uu fure u yahay sare u qaadida iyo Horumarinta Ganacsiga dalka.
Wasiiru Dowlaha Wasaaradda Ganacsiga iyo Warshadaha Soomaaliya Cabduqaadir Shariif Shiikhuna Maye oo ugu dambayn shirka furay ayaa xusay in barnaamijkan uu qeyb ka yahay dib u habeynta ganacsiga Soomaaliyeed oo ay Wasaaraddu waday mudooyinkii dambe, waxaana uu carabka ku dhuftay in ujeedkiisu yahay ganacsiga Soomaaliya la lee dahay qaaradda Afrika isla-mar-ahaantaana loogga qeyb-qaadan lahaa dedaalada socda ee is-dhex-galka dhaqaale iyo weli ba Aaga Ganacsiga Xorta ee Afrika.
