Xildhibaan Cismaan Ciid Maxamed oo kamid ah mudanayaasha Baarlamaanka 11-aad ee Dalka oo dhawaan lagu soo doortey magaalada Baydhabo ayaa xusay in xaalado beni’aadanimo ay ka jiraan qeybo ka mid ah deegaanada Koonfur Galbeed, loona baahanyahay in bulshada reer Koonfur Galbeed ay gurmad dhinac waliba ah u gaarsiin lahaayeen qoysaska abaartu halakeeysay, isagoo dhanka kale u mahadceliyey Dhamaan ergadii soo dooratey iyo cidkasta oo ku garab istaagtay inuu xilkan uu ugu matalo Dadkiisa iyo dalkaba.
Mudne Cismaan Ciid oo wareysi gaar ah siyay Radio Muqdisho ayaa sheegey in waxyaabaha ugu muhimsan ee ka Xildhibaannimo ahaan uu ka shaqeyn doono sidii dadka deegaanka u ku matalo ay u heli lahaayeen adeegyada aas aasiga u ah nolosha, uuna gacan ka geysan doono sidii mashaariic horumarineed looga fulin lahaa deegaannada Maamulka Koonfur Galbeed.
“Si gaar ah waxaan hadda xoogga u saari doonaaa sidii gurmad ku filan ay u heli lahaayeen dadka abaarta ay ku saameysey qeybo kamid ah deegaanada maamulka Koonfur Galbeed, taaa oo hadda meesha ugu daran ee u baahan waxqabad dhab ah, anigoo la kaashan doona cidkasta oo arrinta gurmadka kaalin ka qaadan karta”. Ayuu yiri Xildhibaan Cismaan.
Ugu dambeyn Xildhibaan Cismaan ayaa ugu baaqay bulshada reer Koonfur Galbeed iyo siyaasinta iney ka wada shaqeeyaan xaqiijinta Nabadgelyada iyo horumarka deegaanka, isla markaana siwada jir ah looga hortago cidkasta oo qal qal amni darro abuureysa.
