Xoghayaha Joogtada ah ee Xafiiska Ra’iisul Wasaaraha, Mudane Kamaal Guutaale, ayaa maanta shir-guddoomiyay kulanka billaha ah ee Xoghayaasha Joogtada ah iyo Agaasimayaasha Guud ee hey’adaha dowladda.
Kulanka ayaa diiradda lagu saaray arrimo istiraatiiji ah oo la xiriira dib-u-habaynta hey’adaha dowladda, xoojinta hannaanka maamul, mideynta nidaamyada casriga ah ee dowladda (sida NOL, OSTO, ID, bogagga internetka ee wasaaradaha), iyo qiimeynta warbixinada waxqabadka ee wasaaradaha kala duwan muddadii u dhaxaysay Janaayo ilaa Juun 2025.
Sidoo kale, waxaa shirka lagu soo bandhigay diyaar garowga Banbaxa Golaha Wasiirrada (Cabinet Retreat) iyo qorsheyaasha la xiriira horumarinta iskaashi iyo hufnaan dheeraad ah oo ku saabsan sida Golaha Wasiirrada u wada shaqeynayaan.
Mudane Kamal Gutale ayaa bogaadiyay dadaalka Agaasimayaasha iyo Xoghayaasha, isaga oo xusay muhiimadda ay leedahay in la adkeeyo wada shaqeynta, isla-xisaabtanka, iyo hirgelinta nidaamyo isku xiran oo kor u qaada adeegyada dowladda.
