Kulan deg deg ah oo ay yeelanayaan xubno ka socda 28-ka dowladood ee ku mideysan NATO ayaa looga hadlayaa ololaha ka dhanka ah kooxda Daacish iyo Mintidiin ka soo jeeda Kurdiyiinta, kaasoo ay dowladda Turkigu ka wado xadka ay la wadaago Siiriya.
Kulanka oo ay ku dhawaaqday dowladda Turkigu ayaa looga gol leeyahay in wax looga bedelo howlgalka iyo qalalaasaha ka aloosan xadka labada dal ee Siiriya iyo Turkiga.
Turkiga oo horay uga madax-adeygay siyaasadda Xulufada uu hogaamiyo Mareykanku ayaa diyaaradiisa dagaalku waxaa ay weeraro ka fuliyeen dhowr goobood oo ay ku sugnaayeen Maleeshiyaadka Daacish ee ka dagaalama gudaha Siiriya.
Ra’iisal Wasaaraha Turkiga aya sheegay inuu ka rajeynayo xulufada dalkiisa inay muujiyaan isfaham iyo taageero lagu xoojinayo sida ay dowladda Turkigu uga go’antahay inay wiiqdo awoodda Daacish.
Dadka daraaseeya siyaasadda ayaa sheegaya in weerarada Turkiga ee ka dhanka ah Daacish ay ka caawineyso bururinta saldhigyo ay leeyihiin kooxda PKK ee Kurdiyiinta .
Dowladda Turkiga ayaa aaminsan jirin farqi u dhaxeya Jabhadda PKK iyo Daacish, isla markaana ay yihiin kooxo Argagixiso.
Duqeymo dhicana cirka ah oo ciidamada cirka ee Turkigu ka fuliyeen xadka Siiriya ilaa Jimcihii ayaan ahayn kuwo lagu bartilmaameedsanay Daacish oo kaliya, balse waxaa kale oo lagu wiiqayay awoodda dagaal-yahaniinta Kurdiyiinta ee ka dagaalama Siiriya iyo Ciraaq.
Afhayeen u hadlay Ciidamada Police-ka dalka Turkiga ayaa sheegay inay ilaa todobaadkan xabsiga dhigeen in ka badan 1,000 qof oo looga shakisan yahay inay ka tirsan yihiin Daacish iyo PKK.
Ugu dambeyn dowladda Turkiga ayaa muddo lagu qancinayay in ogolaato saldhigyo looga duulo daacish oo xulafada uu hogaaminayo Mareykanku ka sameystaan gudaha Turkiga. Waxaana lagu wadaa in kulankan ay ka soo baxaan go’aamo ku aadan is kaashi buuxa oo dhex mara Turkiga iyo isbaheysiga uu hogaamiyo Mareykanku.
