C/casiis Xasan Cali waa wiil saddex iyo labaatan sano jir ah oo muddo toban sano uu la xanuunsanayay xanuun dhinaca wadnaha ah ayaa xanuunkaas awgiis la jiifa isbitaalka Banaadir ee magaalada Muqdisho.
Dr Axmed Xasan Aadan oo ah dhaqtarka gacanta ku hayay wiilkaan xanuunsan ayaa sheegay in xaaladda wiilkan ay aad u liidato, isla markaana uu u baahan yahay gargaar degdeg ah.
Related posts
C/casiis Xasan Cali oo laga keenay Dagmada Diinsoor ee Gobolka Baay ayaa waxa uu kasoo jeedaa qoys dan yar ah, Aabihiis waxa uu ku geeriyooday magaaladda Muqdisho xilli uu ku guda jiray raadinta nolol maalmeedka qoyska, Hooyadiisana waxa ay ku xanuunsanaysa magaalada muqdisho.
Midowga ardayda Jaamacada Soomaaliya ayaa maanta deeq lacageed oo gaaraysa kun doolar u fidiyay wiilkaas, taasoo ay ugu tala galeen in ay kaga qeyb qataaan caawintiisa si wax looga qabto xaaladiisa caafimaad.
Cabdullaahi Cumar Sheekh oo ah Guddoomiyaha Midowga Ardayda Jaamacadda Soomaaliya ayaa sheegay in tani ay hordhac u tahay caawimaad ay mar walba la garab taaganyihiin wiilkan xanuunsan.
Jaamac Xasan Maxamuud oo ah Hormuudka Arrimaha Ardayda ee Jaamacada Soomaaliya ayaa ugu baaqay shacabka soomaaliyeed in ay ka qayb qaataan caawinta wiilkan xanuunsan.
Wiilkan ku xanuunsanaya Magaalada Muqdisho ayaa gacan qabasho ugu baahan dhamaan umadda Soomaaliyeed meel walba ay joogaan.
