Muqdisho, 18, September, 2017…..Ra’iisul Wasaaraha Xukuumadda Federaalka Soomaaliya Mudane Xasan Cali Khayre iyo wafdi uu hoggaaminayo ayaa maanta u ambabaxay dalka Mareykanka, halkaas oo uga qeyb gali doono shirka Golaha loo dhan yahay ee Qaramada Midoobey.
Mudane Khayre oo safarka ay ku weheliyeen xubno ka tirsan Golaha Wasiirada iyo madax kale ayaa garoonka Muqdisho ka raacay diyaaradaha rakaabka qaada, si loo ilaaliyo hantida qaranka iyo dhaqaalihii faraha badnaa ee ku bixi jirey safarada madaxda Qaranka.
Ra’iisul Wasaaraha ayaa inta uu sugan yahay dalka Mareykanka sidoo kale la kulmi doono qaar kamid ah hoggaamiyaasha Caalamka ee shirka ka soo qeyb galaya.
Dhinaca kale Wasiirka arimaha dibada Xukuumadda Soomaaliya Yuusuf Garaad Cumar iyo wafdi uu hogaaminayo ayaa si hordhac kaga horeeya magaalada New York wafdiga Ra’iisul wasaaraha.
Dhanka kale, wasiirka arimaha dibadda Soomaaliya mudane Yusuf Garaad Cumar ayaa ka qeybgalay shirka dalalka caalamka Islaamka iyo Mareykanka oo sanadkasta la qabto ka hor shirka guud ee Qaramada Midoobay.
Qoraal uu soo dhigay bartiisa Facebooka ayuu Yusuf Garaad ku sheegay in shirkan la qabanayay 15 sano ee u dambeeyay isla markaana ay maalgeliso dowladda Qatar.
“Maanta aniga oo wakiil ka ah Madaxweynaha ayaan Soomaaliya ku matalay Madasha Muslimka iyo Mareykanka oo sannadkiiba mar la qabto,” ayuu sheegay Yusuf Garaad.
Wasiirka arimaha dibadda iyo iskaashiga caalamka ee xukuumadda Soomaaliya ayaa intaa ku daray in ka qeybgalka shirkaas ku wehliyeen danjiraha Soomaaliya u fadhiya xarunta Qaramada Midoobay Abuukar D. Cusmaan iyo danjiraha Soomaaliya ee London C/raxmaan Ceynte.
Madaxda dalalka caalamka Islaamka ee shirkaas ka qeybgalay ayaa waxaa kamid ahaa Amiirka Qadar, Sheikh Tamim bin Hamed Al Thani iyo madax kale. 
