Xaflad si heer sare ah loo soo agaasimay, ayna ka soo qayb galeen agaasinka sare ee bankiga Premier, guddoomiyaha rugta ganacsiga iyo warshadaha Soomaaliyeed iyo ku xigeenkiisa, guddoomiyaha midowga ganacsatada Suuq-bacaad, ganacsatada deegaanka Suuq-bacaad, odayaasha dhaqanka iyo ururada bulshada ee deegaanka ayaa shalay lagu qabtay xarunta cusub ee bankigu ka furtay suuq-bacaad.
Guddoomiyaha midowga ganacsatada Suuq-bacaad Mudane Cabdiraxmaan Axmed Cumar (Cabdi Barre) oo munaasabadda ka hadlay ayaa sheegay in ay aad u soo dhaweynayaan bankigan oo uu ku sheegay mid laga filayo in uu ku soo kordhiyo deegaanka horumar xagga bilicda ah, adeeg banki oo wanaagsan iyo in uu maalgelin ku sameeyo ganacsiyada suuqa ka socda.
Mudane Caabdicaziz Cali Ciid oo ka tirsan agaasinka sare ee bankiga Premeir oo isaguna xafladda ka hadlay ayaa ku dheeraaday adeegyada bankigu ku soo kordhin doono deegaanka, isaga oo si gooni ah u xusay adeegyada kaararka lacag-bixinta ee Visa iyo MasterCarad, adeegga SWIFT ee lacagaha adduunka la isugu diro iyo maalgelin waafaqsan shareecada Islaamka oo ay ka faa’iideysan karaan ganacsatada deegaanka.
Guddoomiha rugta ganacsiga iyo warshadaha Soomaaliyeed, Mudane Maxamuud Cabdikarim Gabayre oo isaguna ka hadlay munaasabadda ayaa sheegay in ay bankiga Premeir soo dhaweynayaan isaga oo dhinaca kale ku dheeraaday ahmiyadda bankiyadu u leeyihiin horumarka dhaqaalaha bulshooyinka.
Guddoomiyaha agaasinka sare e Premier bank oo soo xiray munaasabadda ayaa hoosta ka xarriiqay in ay xil weyn iska saarayaan sidii bulshada Soomaaliyeed u heli lahaayeen adeeg banki oo la mid ah kan caalamka isaga oo dhanka kale u mahad celiyay akhyaarta deegaanka Suuq-bacaad ee xafladda ka soo qayb gashay.
Bankiga Premier oo ah bankigii ugu horeeyay ee taariikhda Soomaaliya keena adeegga kaararaka ee VISA iyo MasterCard ayaa hadda Muqdisho ku leh afar laamood iyada oo maamulka bankigu sheegeen in ay dalka ku sii baahin doonaan adeegyada bankiga Premeir.
