Kulankan oo ahaa mid diiradda lagu saarayay burburka wadooyinka magalada Kismaayo iyo waddo si qaldan loo dhisay sidii dib u dhis loogu sameyn lahaa ayaa waxaa ka soo qeebgalay masuuliyiinta maamulka jubbaland iyo dhammaan qeybaha bulshada magalada iyo masuuliyiin ka socotay hay’adda USAID
Kulanka ayaa waxaa ka hadlay qeybihii buslahada ee ka soo qeybgalay iyagoona si iskumid ah u sheegay in uu jiro burburka waddooyinka qaar, loona baahan yahay in dib u dhis lagu sameeyo.
Ugaas Xasan Siraad Afdhuub oo u hadlayay wax garadka magaalada Kismaayo ayaa sheegay in uu jiro qalad dhanka dhismaha waddooyinka ah, loona baahan yahay in lala Xisaabtamo hay’adaha dhismaha loo xil saaray.
Guddoomiyaha dagmada Kismaayo Ibraahim Maxamed Yuusuf Tima jilic oo kulanka kadib Saxaafadda la hadlay ayaa sheegay in maamulku uusan ogolaaneyn in la qiyaano dhismaha waddooyinka islamkaraana lala xisaabtami doono hay’ad kastaa oo qandaraas ku qaadata dhismaha waddooyinka habka ay wax u qabaneyso.
Wasiirka arrimaha gudaha iyo amniga maamulka Jubbaland Maxamed Warsame Darwiish oo kulankaasi ka hadlay ayaa isagana dhankiisa sheegay in maamulka ahaan lala xisaabtami doono hay’adaha dhismaha magaalada qandaraaska ku qaata si bulshadu u hesho waddooyinka wanaagsan.
Kulankan oo ay soo qabanqaabisay Wasaaradaha arrimaha gudaha iyo amniga Jubbaland ayaa ku soo beegmaya xilli uu burbur baahsan ka jiro waddooyinka magalada Kismaayo islamarkaana ay jirto waddo ay hay’adda USAID ku bixisay lacag dhan Halmilyan oo doolar balse si qaldan loo dayactiray marka loo eego gododka ka qodan hareeraha waddooyinka, iyadoona arintan kal hore uu si kulul uga hadlay Madaxweynaha maamulka jubbaland Axmed Maxamed Islaam (Axmed Madoobe)
Wariyaha Warbaahinta Qaranka ee Kismaayo Aadan Max’ed Salaad
