Madxafkii ugu horeeyey oo lagu keydiyo in ka badan 700 oo shey oo ay Soomaalida leedahay ayaa waxa uu ku yaalaa Magaalada Minnepolis ee Gobolka Minnesota halkaasi oo ay ku nool yihiin Soomaalida ugu badan dalka Maraykanka.
Waxaana madxafkaasi booqday warbaahinta qaranka Soomaaliyeed oo sawiro iyo muuqaalo ka soo qaaday dhismaha madxafka Soomaalida oo ka kooban laba dabaq waxaana halkaasi ku keysan agabka ay Soomaalida isticmaasho iyo kuwo horey loo isticmaali jiray oo taariikhi ah.
Aas aasaha Madxafkani oo lagu magacaabo, Cusmaan Cali,oo la hadlay warbaahinta qaranka ayaa sheegay in hada aysan ahayn sida uu u malaynayey markii uu isku daygani samaynayey isla markaana uu aad ugu faraxsan yahay in maanta madxafka Soomaalida loo soo dalxiis tago oo ay yimaadaan dad ajaanib ah oo wadamo badan ka yimaada iyagoo baranaya dhaqanka iyo hidaha dadka Soomaaliyeed.
Wariye Liibaan Xuseen oo dalka Mareykanka ugu soo waramay warbaahinta qaranka ayaa soo sheegay in markii aad gasho gudaha madxafkani ayaa waxaa ku arkaysaa hidaha iyo dhaqanka Soomaaliya waxaana soo xasuusanaysaa waayo waayo waxayna arintani macno weyn u samaynaysaa dadka kalhore wadanka ka soo tagay oo markii ay arkaan si weyn ugu farxaan, waxana sidoo kale ka faa’ideysta carruurta Soomaaliyeed ee wadamada qurbaha ku dhashay kuna koray oo halkani loo dalxiis geeyo.
Madxafkani ayaa waxaa ka shaqeeya shaqaale kala duwan oo u kala dhashay wadamo badan wuxuuna ku yaala dhex bartanka magaalada ganacsiga ee Minneapolis oo ah meel Soomaalida ay ku badan yihiin.
W/D: Liibaan Xuseen
