Shekh Cali Maxamuud Xasan ( Sheikh Cali Wajiiz oo ka mid ah culimada Soomaaliyeed, ayaa ugu baaqay maleeshiyada Alshabaab ee xag jirka ah in ay dagaalka joojiyaan, ayna u turaan bulshada Soomaaliyeed ee soomman.
Sheikh Cali Wajiiz, oo marti ku ahaa barnaamijka Tubta Toosan ee Radio Muqdisho, ayaa sheegay in bisha Ramadaan ay tahay bil naxariis iyo is caawin, balse aysan ahayn bil colaad,dil iyo qarax.
Waxa uu Sheikhu sheegay in kuwa dagaalka hurinaya sida Alshabaab ay hareer marsan yihiin shareecada Islaamka, ayna dooddoodu tahay mid khaldan.
Sheikha ayaa caddeeyay in dalka Soomaaliya ay ka jirto dowlad Islaamka ku dhaqanta, isagoo dadka xusuusiyay in baarlamaanka Soomaaliyeed uu si aan loo kala harin u ansixiyay in dalka lagu dhaqo shareecada Islaamka.
Sheikh Cali Wajiiz ayaa tilmaamay in Alshabaab ay ku gacan seyreen isku day kasta oo xal lagu gaari lahaa, ayna caqabad ku yihiin hir gelinta shareecada Islaamka ee ay sheeganayaan.
Sheikh Cali Wajiiz, ayaa dhanka kale ka hadlay sida ay xaaraan u tahay in lala dagaallamo dowladda iyo madaxda dalka hoggaamineysa, oo uu sheegay in la dagaallankooddu uu dalka gelinayo colaad daba dheeraata iyo in ay burburto danta guud.
Waxa uu kula taliyay dhallinyarada la marin habaabiyay ee ka tirsan Shabaab in ay bulshadooda ku soo laabtaan ayna joojiyaan colaadda.
Waxa uu sheikhu tilmaamay in aan janno lagu galeynin daadinta dhiigga dadka muslimka ah ee soomaaliyeed.
Barnaamijka oo dhammeys tiran ka dhageyso halkan
