War qoraal ah oo ka soo baxay Ururka Iskaashiga Islaamka ee (OIC) ayaa lagu muujiyay diidmada fal kasta oo ka dhan ah madax-bannaanida iyo wadajirka dhuleed ee Jamhuuriyadda Soomaaliya.
Xoghayaha Ururka Iskaashiga Islaamka, ayaa sheegay in loo baahan in Dowladda Soomaaliya lagu ixtiraamo madax-bannaanideeda dhuleed.
Bayaan ka soo baxay Ururka Iskaashiga Islaamka ayaa lagu yiri: “OIC waxaa ka go’an adkeynta iyo ixtiraamka madax-bannaanida iyo wadajirka dhuleed ee Dawladaha xubinta ka ah OIC, si waafaqsan Axdiga Ururka Iskaashiga Islaamka iyo sharciga caalamiga”.
Marka laga hadlayo Isfahamka dhexmaray Dowladda Federaalka Itoobiya iyo maamulka Somaliland 1-dii Janaayo 2024, Ururka Iskaashiga Islaamka (OIC) waxuu adkeynayaa diidmada fal kasta oo ka dhan ah madax-bannaanida iyo wadajirka dhuleed ee Jamhuuriyadda Soomaaliya, ayaa lagu soo gabagabeeyay Bayaankan ka soo baxay Ururka Iskaashiga Islaamka (OIC).
